| Demosthenes, Speeches (XML Header) [genre: prose; rhetoric] [word count] [lemma count] [Dem.]. | ||
| <<Dem. 44.52 | Dem. 44.55 (English) | >>Dem. 44.59 |
44.54ἀλλὰ μὴν καὶ πρεσβύτερά γε αὑτοῦ διαμεμαρτύρηκεν . ὁ γὰρ μήπω ἐν τῷ οἴκῳ τῷ Ἀρχιάδου ὤν , ὅθʼ ἡ λῆξις αὕτη τοῦ κλήρου ἐγένετο , πῶς ἂν εἰδείη τι τούτων ; ἔπειτʼ εἰ μὲν αὑτὸν διεμεμαρτυρήκει , εἶχεν ἂν λόγον αὐτῷ τὸ πρᾶγμα · ἀδίκως μὲν ἂν ἔγραφεν , οὐδὲν δʼ ἧττον ὑπὲρ τοῦ κατὰ τὴν ἡλικίαν γʼ ὄντος . νῦν δὲ γνησίους υἱοὺς γέγραφεν τῷ Ἀρχιάδῃ ἐκείνῳ εἶναι , τόν τε αὑτοῦ πατέρα δῆλον ὅτι καὶ τὸν κατὰ τὴν ἐξ ἀρχῆς ποίησιν , οὐκ ἐπιλογισάμενος ὅτι ἐπανεληλυθότες ἦσαν . οὐκοῦν ἀνάγκη πρεσβυτέρας πράξεις αὐτὸν καὶ μὴ τὰς ἐφʼ ἑαυτοῦ γεγενημένας διαμεμαρτυρηκέναι . εἶθʼ ὑμεῖς τῷ τοῦτο τετολμηκότι πιστεύσετε ὡς ἀληθῆ λέγοντι ;
44.55νὴ Δίʼ , ἀλλʼ ἀκηκοὼς τοῦ αὑτοῦ πατρὸς διαμεμαρτύρηκεν . ὁ δέ γε νόμος ἀκοὴν τῶν τετελευτηκότων κελεύει διαμαρτυρεῖν , <οὐ > ζῶντος τοῦ πατρὸς τὰ ὑπʼ ἐκείνου πραχθέντα . ἐπεὶ κἀκεῖνο · διὰ τί ποτε Λεώστρατος οὑτοσὶ οὐχ αὑτόν , ἀλλὰ τοῦτον ἐπεγράψατο τῇ διαμαρτυρίᾳ ; τὰ γὰρ πρεσβύτερα τῶν πραγμάτων τὸν πρεσβύτερον ἔδει διαμαρτυρεῖν . ὅτι νὴ Δίʼ , ἂν εἴποι , τοῦτον γὰρ εἰσπεποίηκα υἱὸν τῷ Ἀρχιάδῃ .
44.56οὐκοῦν σὲ τὸν εἰσποιοῦντα καὶ κατασκευάζοντα τὰ πράγματα καὶ λόγον ἔδει διδόναι , γενόμενον ὑπεύθυνον ὧν πεποίηκας · πολλή γε ἀνάγκη . ἀλλὰ τοῦτο μὲν ἔφυγες , τῇ διαμαρτυρίᾳ δὲ τοῦτον οὐδὲν εἰδότʼ ἐπεγράψω . ὥστε φανερὸν ὑμῖν ἐστιν , ὦ ἄνδρες δικασταί , τὰ διαμαρτυρούμενα μὴ εἶναι ἀληθῆ , καὶ παρʼ αὐτοῖς γε τούτοις ὁμολογεῖται . καὶ μὴν κἀκεῖνο δίκαιόν ἐστιν , μὴ λέγοντος αὐτίκα μάλʼ ἀκούειν Λεωστράτου τουτουί , ὑπὲρ ὧν γε διαμαρτυρῆσαι οὐκ ἐτόλμησεν .
| Demosthenes, Speeches (XML Header) [genre: prose; rhetoric] [word count] [lemma count] [Dem.]. | ||
| <<Dem. 44.52 | Dem. 44.55 (English) | >>Dem. 44.59 |
